جريدة عالم السياحة والاقتصاد، تهتم بصناعة السياحة باطيافها ، الشؤون الاقتصادية والبيئة والسياحة الدينية والمغامرة والسفر والطيران والضيافة

شي غاد..؟ مقالة:ايمان عكور

430

والله اني مقهورة كثير وانا بكتب هالكلمات. .
مقهورة وموجوعة على وطني..اللي مصرة الحكومات المتعاقبة انها تحاصر وتغتال كل نافذة حلم ممكن تفتح قدام اي مواطن..

ماراح أطول عليكم..
انا حاليا في منتجع في شرم الشيخ
مساحته قد 5 منتجعات بالعقبة او البحر الميت..
وجبات اكل وشرب بأنواعه 24 ساعة
نشاطات..وحفلات..وألعاب.. وترفيه للكبار والصغار..جنسيات من كل العالم
خدمة زي الفل.. نظافة وسرعة
الغرف عبارة عن جناح كبير مع انه احنا دافعين غرف standard
طبعا ما راح انسى
ايوة يا افندم..شكرا حضرتك..تؤمري..منورة..وجوه مبتسمة طول الوقت وهي تحت درجة حرارة نار..بتشتغل من غير ما تتذمر وتحملك مليون جميل وهي بتقدملك الخدمة زي بعض المطاعم عنا..
الأهم.. كل هالحكي دفعنا عليه 520 دينار
على الشخص 6 ايام مع الطيارة طبعا والمواصلات.
يعني تكلفة ليلتين يا دوب بواحد من فنادق الخمس نجوم في البحر الميت او العقبة
اللي ما فيهم عشر المتعة الموجودة هون
اللي قنينة المي سعرها ٣ دنانير
طيب وين يروحوا الناس..الشط مش الهم..والهوا مش الهم..والمية مش الهم..
ثلاث ارباع الأردنيين ما وصلوا البتراء والا اي محمية..ما عمرهم شافوا البحر حتى لو كان ميت..

ما راح أضل اقارن..لانه احنا الخسرانين

اللي خلاني اكتب هو القرار المفجع اللي قرأته عن فرض الحكومة ، يا ريت غرامة لكن عقوبة وتجريم لكل من يؤجر مزرعته وخاصة إذا فيها بركة سباحة..
المضحك بالموضوع يا ريت انه بدهم ينظموا القصة تحت شروط معينه وهذا لا اعتراض عليه….القصة غير هيك .
قال خايفين من عدم تواجد شروط السلامة العامة عند البرك..
طيب لو طلعتوا بسبب مقنع شوي كنا يمكن نشكركم على خوفكم علينا…بس تقولولي انه هامكم سلامة المواطن..هاي كذبة كبيرة انتو مش قدها..
احكيلي بالله يا حكومة الجباية
( ترا عارفين فكرة انه ما في جباية على أصحاب المزارع اللي بأجروا مزارعهم للمواطن الغلبان) مش مخليتكم تناموا
واكيد في مافيا شغالة ضد هالقصة
مش من مصلحتها انه الناس والعائلات واطفالهم اللي حبستوهم سنتين وخليتوا نصهم امراض نفسية من اجراءاتكم المتخلفة باسم كورونا يتهنوا بيوم اجازة على قد فلوسهم..
راح اقلكم باختصار..وعلى رأي ابو عواد الله يرحمه
“وشي غاد “..؟

يا حضرة الحكومة..
ترا مش كل الناس سكان دابوق وعبدون وعمان الغربية
المزارع كانت المتنفس الوحيد النا جميعا..حتى سكان الغربية
خصوصية للعائلات..وبالاخص الصبايا
بنشترك كلنا بالتكاليف.. وبنمضي يوم بعيد عن الازعاج والضجة وحبسة البيت.
ليش بدكم تحرموهم حتى من هالمتعة.

وين يروحوا الاهل باطفالهم..
اذا حدائق عامة غير موجودة..واللي كانت سخرتوها كلها للكورونا وتركتوا مئات العائلات يوميا سهرانة مع اطفالها على الارصفة.. والسيارات حواليهم
وبتقولولي سلامة وامان..؟
حدائقكم حتى المراجيح فيها مصدية وخربانة مثل اغلب القرارات المتخبطة اللي بتطلعوا فيها..يعني لا سلامة ولا امان..؟

ليش مصرة الحكومات انها تسرق حرية كل مواطن بفكر انه يحلم..؟
ليش مصرين ولانكم ما بتحبوا الوطن وبتكذبوا وبتنافقوا علشان مصالحكم
مصّرين تتحججوا انه قراراتكم هي علشان سلامة المواطن المقهور الغلبان اللي رغم كل الوجع بعده بقلكم..
وبتسألوا ليش الأردني حتى اللي راتبه على قده بروح مصر أو تركيا لما يفكر باجازة ولو مرة بالعمر..
انا بحب الوطن. وغصبن عنكم راح أضل احبه..
اما انتوا يا مافيات السرقة والفساد..
راح أضل اقاتلكم حتى الوطن نفسه يكشف زيفكم…
فيا ريت لا تكذبوا وتصدقوا القصة..؟
وشي غاد..؟

ايمان_عكور